IHMK-ja përmes një komunikate për media ka bërë të ditur se në pesë ditët e ardhshme në Kosovë do të jetë moti me diell, por edhe me shi nga e mërkura.
“Dy ditët e para të javës vijuese moti do të jetë i qëndrueshëm dhe stabil, duke e mbajtur gjendjen termike të pandryshueshëm dhe intervalet e gjata me diell. Nga e mërkura priten kushte tjera meteorologjike, meqë masat e ngrohta të ajrit të ardhura nga pjesa veriperëndimore dhe jugperëndimore e vendit, me vete do të sjellin edhe vranësira të cilat do të shoqërohen me reshje shiu”, thotë IHMK, transmeton Koha.net.
Sa i përket fushave barike nuk do të kemi luhatje të mëdha, me vlera minimale nën normalen dhe me 1-3 milibar mbi vlerat e normales, ndërsa në fushat termike do të kemi rënie të temperaturave për 2-4 gradë Celsius nga mesi i javës.
Indeksi UV mbetet në shkallë të rrezikshmërisë, prandaj këshillat e mjekut për tu mbrojtur nga rrezet direkte të diellit mbeten në fuqi. Temperaturat minimale do të lëvizin nga 13-16 gradë Celsius, ndërsa maksimalet e ditës parashihen të lëvizin ndërmjet 28-32 gradë Celsius. Do të fryjë erë nga veriperëndimi dhe jugperëndimi me shpejtësi 1-7m/s.
