Në kuadër të vizitës zyrtare në Austri, kryeministri i Kosovës, Ramush Haradinaj, sot në Vjenë ka zhvilluar një takim me zëvendëskancelarin e Austrisë, Heinz-Christian Strache me të cilin ka biseduar për shumë tema me interes të veçantë për të dyja vendet.
Haradinaj e ka falënderuar zëvendëskancelarin Strache për përkrahjen që Austria i ka dhënë Kosovës në të gjitha etapat e shtetndërtimit duke shprehur nevojën që kjo mbështetje të vazhdojë edhe në këtë fazë të fuqizimit të subjektivitetit ndërkombëtar të vendit.
“Austria, historikisht është vend mik i Kosovës dhe ne jemi të përkushtuar që t’i ruajmë dhe avancojmë marrëdhëniet bilaterale, duke e shtuar bashkëpunimin në fusha konkrete, aty ku tregu i Kosovës ka më shumë nevojë si dhe përkushtimin që të krijohen kushte sa më të mira legjislative dhe administrative për investitorët austriakë”.
Kreu i qeverisë kosovare e ka njoftuar zëvendëskancelarin Strache për të gjitha zhvillimet në vend, me theks të veçantë për reformat në administrative dhe ekonomike, për vendosshmërinë për të krijuar marrëdhënie të mira ndërfqinjësore dhe për procesin e dialogut me Serbinë.
Ai, ashtu sikur edhe nga kancelari austriak Sebastian Kurz, ka kërkuar edhe nga zëvendëskancelari Heinz-Christian Strache ndihmë për liberalizimin e vizave.
“Kosova ka treguar seriozitet në temat dhe obligimet e saja karshi fqinjëve dhe vendeve të BE-së dhe kjo duhet të jetë reciproke. Kosova është vend i vetëm që nuk e gëzon të drejtën të lëvizë lirshëm, përkundër që ka përmbushur të gjitha obligimet e saja karshi BE-së për këtë çështje”.
“Ne kemi nevojë për ndihmën e Austrisë në liberalizimin e vizave duke na vënë në agjendë për votim gjatë udhëheqjes me presidencën e BE-së”.
Zëvendëskancelari austriak i tha kryeministrit Haradinaj se mbështetja e Austrisë do të vazhdojë edhe në të ardhmen dhe do të jetë partnere e fuqishme e zhvillimit ekonomik të Kosovës dhe rajonit.
