Një grabitje e armatosur ka ndodhur në orët e para të mëngjesit në Podujevë, njofton Llapi.info
Disa persona nën kërcënimin e armës kanë grabitur një sasi të hollash dhe disa pako cigare në pompën e derivateve “Apollonia” në rrugën ish “Brigadat” në dalje të qytetit të Podujevës.
Rastin e ka konfirmuar edhe komandanti i Stacionit Policor të Podujevës, Bekim Bislimi. Bislimi ka thënë se grabitësit janë larguar nga vendi i ngjarjes në drejtim të panjohur, derisa Policia po punon në zbardhjen e rastit.
“Ka ndodhur një incident në rrugën ish ‘Brigadat’. Rasti është raportuar në orën 04:20. Disa persona të dyshimtë nën kërcënim e armës kanë marr disa mjete monetare dhe disa pako cigare. Nuk ka persona të lënduar. Rasti është nën hetime”, ka thënë Bislimi.
Ndryshe, Policia e Kosovës ndërkohë është mobilizuar pas grabitjeve të armatosura të cilat janë bërë të shpeshta./Llapi.info
