Këshilli Komunal për Siguri në Bashkësi i Komunës së Podujevës gjendjen e sigurisë në komunë e ka vlerësuar të qetë dhe stabile si dhe është informuar për gjendjen e pyjeve dhe ka miratuar planin e punës për vitin 2019, transmeton Llapi.info
Këshilli Komunal për Siguri në Bashkësi (KKSB) i Komunës së Podujevës, në mbledhjen e sotme, të kryesuar nga kryetari i Komunës, Agim Veliu, ka shqyrtuar raportin e Policisë së Kosovës dhe KFOR-it për gjendjen e sigurisë në Komunë; Planin e punës të KKSB për vitin 2019 dhe Informatën për aktivitetet e KKSB për vitin 2018.
Komandanti i Stacionit Policor në Podujevë, kapiteni Bekim Bislimi, duke raportuar për gjendjen e sigurisë në komunën e Podujevës, tha se gjendja e sigurisë në komunë është e qetë dhe stabile.
Bislimi tha se krahasuar me të njëjtën periudhë të vitit të kaluar është shënuar rënie i rasteve të raportuara të dëmtimit të pronës, vjedhjeve dhe vjedhjeve të rënda.
Më tej komandanti Bislimi tha se Policia është duke realizuar planet operative me qëllim të parandalimit të veprave që cenojnë rendin dhe sigurinë në përgjithësi.
Gjendjen e sigurisë e kanë vlerësuar të qetë dhe stabile edhe përfaqësuesit e KFOR-it dhe FSK-së në KKSB.
Në mbledhjen e sotme KKSB miratoi edhe Planin e punës për vitin 2019 dhe Informatën për aktivitetet e KKSB për vitin 2018./Llapi.info
