Kryetarët e sapozgjedhur të katër komunave veriore po vazhdojnë avazin e vjetër, duke mos pranuar të betohen para flamurit dhe para simboleve të Republikës së Kosovës. Veprimet e tilla të Listës Serbe pritet që ta “bllokojnë” përsëri situatën në veri të vendit.
Deputetja e partisë opozitare LDK-së, Besa Gaxherri, tërë situatën në veri të vendit e sheh si kaos, që sipas saj i kanë kontribuar në veçanti deklaratat e presidentit të Kosovës Hashim Thaçit për ndarjen e Kosovës.
“Situata në veri është një situatë e cila po vazhdon me vite të tëra, por fatkeqësisht para disa viteve atje ka qenë situata shumë më mirë sesa tash. Madje kjo ka ndikuar që të jepen deklaratat e presidentit të vendit, i cili e ka vënë në pikëpyetje territorin dhe natyrisht që Lista Serbe ka filluar t’i bëjë këto sjellje që me të vërtetë të arrijë qëllimin për ndarjen e Kosovës. Presidenti Thaçi fatkeqësisht këtë gjë e ka konfirmuar në një formë ose në tjetrën dhe tashmë hapat e tyre janë shumë më ekstremë sesa kanë qenë më herët”, ka theksuar ajo, për Gazetën Zëri.
Gaxherri ka thënë po ashtu se situata në veri është e papranueshme dhe duhet të ketë reagim të ashpër nga vetë Qeveria e Kosovës, e cila duhet të mbrojë shtetësisë dhe sovranitetin e vendit.
“Kjo është një situatë e papranueshme dhe sigurisht që Qeveria duhet të merret seriozisht me këtë situatë, por problemi është që Qeveria i ka aktualisht të acaruara raportet me BE-në dhe gjitha këto janë duke ndikuar që Lista Serbe të reagojë kështu siç është duke reaguar tash. Megjithatë duhet të dihet që Kosova është një territor i pandashëm, ka sovranitetin e vet dhe ka kufijtë e vet, këtë duhet ta dijë edhe minoriteti serb në Kosovë, edhe BE-ja, sepse nuk mund të shkohet me tutje me tentativat për lëvizje të kufijve”, ka shtuar ajo.
