Llapi ka arritur ta mposht në Drenas kampionin në fuqi Feronikelin me rezultat 2-1, njofton Llapi.info.
Mentor Zhdrella shënoi golin e parë për llapjanët, në fund të pjesës së parë. Mevlan Zeka barazoi gjithçka në minutën e 81-të, ndërsa i njohuri për golat në minutat e fundit, Mërgim Pefqeli, shënoi në minutat shtesë për t’ia siguruar fitoren e pestë këtë edicion ekipit nga Podujeva.
Tekniku llapjan, Tahir Bataitna ka folur pas ndeshjes për mënyrën se si skuadra e tij e gjeti rrugën e fitores në “Rexhep Rexhepi” për herë të parë në historinë e klubit.
“Gjithmonë kur të luash kundër kampionit është vështirë, jemi mobilizuar për këtë ndeshje që të luajmë maksimalisht, të shënojmë një gol në pjesën e parë. Komplet pjesa e dytë ishte taktizim, ku donim ta shënonim golin e dytë dhe të dilnim shpejtë në sulm. I kam kushtuar shumë rëndësi Kastriot Rexhës, të cilin e kemi mbuluar mirë dhe i përgëzoj futbollistët e mi. Në pjesën e dytë gjithmonë kemi luajtur me tri pasime dhe kemi dalë shpejtë në sulm. Atmosfera është e jashtëzakonshme në skuadër dhe mendoj që e meritojmë këtë fitore sidomos ndaj Feronikelit”, ka thënë pas ndeshjes Batatina.
Ndërkaq, në një postim në rrjetin social Facebook, Batatina ka thumbuar Federatën e Futbollit të Kosovës, pasi që sic thotë ai, ekipi i tij u dëmtua nga referimi.
“Urime fitorja të gjithë qytetarëve të Llapit dhe Gollakut dhe veçanërisht Legjendave. E dëshmuam se jemi qyteti i fitores! Kërkoj nga FFK-ja të ndryshoj qasjen ndaj Llapit dhe qytetit të futbollit ku nisi karrierën Legjenda Fadil Vokrri. Ne fituam por u dëmtuam në masë të madhe nga referimi pasi dy penallti nuk u akorduan për ne kurse faulla pa masë për kundërshtarin. Po ashtu kartona të shumtë e pa nevojë për futbollistët tanë.
Kërkoj nga komisioni i referimit, Përparim Hasani dhe Malazog Hoxha të jenë të kujdesshëm ndaj skuadrës së Llapit. Kryetarit të FFK-së dua ti them se nëse dëmtohemi në këtë formë nuk e di se kush do t’ia mbuloj shpenzimet Llapit. Pra kërkojmë të ndryshoj qasja ndaj Llapit dhe qytetit të futbollit”, ka shkruar ai.
Me këtë fitore Llapi renditen në pozitën e parën me 17 pikë, ndërsa Feronikeli në pozitën e tretë me 15 pikë.
Në ndeshjen e radhës, Llapi pret në “Zahir Pajaziti” Ferizajn, ndërsa Feronikeli udhëton në Mitrovicë për t’u ndeshur me Trepçën ’89./Llapi.info
