Shoqëritë Civile që veprojnë në Komunën e Podujevës, sot i kanë dorëzuar kërkesën kryetarit të Podujevës, Agim Veliu dhe kryekuvendarit në këtë Komunë, Fatmir Gashit për procedimin e rregullores për organizimin dhe bashkëpunimin e Komunës me fshatrat, vendbanimet dhe lagjet urbane në territorin e Podujevës, njofton Llapi.info.
Këtë kërkesë në emër të shoqërive e ka bërë OJQ “Demokracia Fillon Këtu”, në krye me Shemsi Jasharin. Sipas njoftimit, duke kërkuar që e njëjta të miratohet, kjo rregullore ka mbetur e bllokuar nga ekzekutivi për më shumë se një vit.
“Sot, në emër të Organizatave të shoqërisë civile që veprojnë në komunën e Podujevës dorëzova kërkesën për Kryetarin z.Agim Veliu dhe Kryesuesin e kuvendit z.Fatmir Gashi, për të proceduar për MIRATIM në Kuvend të: Rregullores për Organizimin, Funksionimin dhe Bashkëpunimin e Komunës me Fshatrat, Vendbanimet dhe Lagjet Urbane. Kjo rregullore është bllokuar nga Ekzekutivi, tani mbi një vit e gjysmë ( nga qershori 2018) dhe ka mbajtur peng funksionimin e rregullt dhe të drejt të këshillave të Fshatrave, Vendbanimeve dhe Lagjeve Urbane”, thuhet në njoftimin e tyre.
Duke përmendur aktivitetet të cilat i organizojnë, në njoftim thuhet se këto shoqëri civile presin reflektimin e zyrtarëve për miratimin e kësaj rregulloreje, që sipas OJQ-ve, është kërkuar edhe nga qytetarët.
“Gjatë tërë vitit në çdo aktivitet, debat publik, tryeza diskutimi, paraqitje mediale, etj. Është kërkuar nga qytetarët, shoqëria civile dhe partitë opozitare, procedimi i kësaj rregulloreje. Presim reflektimin e zyrtarëve përgjegjës për të dërguar për miratim të kësaj rregulloreje, gjithashtu zotohemi për të ndërmarr veprime tjera legjitime nëse vazhdon heshtja në këtë drejtim”, thuhet tutje./Llapi.info
Organizatat mbështetëse të kësaj kërkese:
- Rrjeti- Demorkacia Fillon Këtu-DFK
- Sundimi i Demokracisë në Kosovë-SDK
- Organizata “OAKTIV”
- Kosovo Center for Democracy – KCfD
- Organizata “QENDRIMI” (nga komunitetet)
- Iniciativa për Ide dhe Alternativa-IIA
