Dega e PDK-së në Prishtinës po e kundërshton idenë e Shpend Ahmetit për ta bërë me pagesë hyrjen me vetura në Prishtinë, raporton Ekonomia Online.
Deputetja e PDK-së Eliza Hoxha konsideroi se taksa është hapi i fundit në menaxhimin e lëvizshmërisë brenda një qyteti atëherë kur të gjitha hallkat janë në funksion dhe qytetarët pa dallim kanë një mori alternativash dhe mundësish për të lëvizur në qytet dhe jashtë tij.
“Kur jemi tek mobiliteti dhe infrastruktura lirisht mund të themi se të gjitha rrugët shpiejnë në Prishtinë. Partia Demokratike e Kosovës sa ishte në pushtet në nivelin qendror ka realizuar një mori projektesh infrastrukturore në nivel vendi, autostradat si dhe zgjerimin dhe trajtimin e rrugëve regjionale që Prishtina të jetë e lidhur sa më mirë me të gjitha qytetet e tjera”, tha ajo.
“Midis shumë premtimeve të parealizuara nga qeverisja aktuale ajo ka përmendur mosrealizimin e rrugës A dështimin e krijimit të sistemit të integruar të biletave, moslirimin e studentëve nga pagesa dhe ndërtimin e një stacioni modern të autobusëve. Sipas saj, të thirresh në taksë për me pak makina e më pak ndotje në qytet e të ndërtosh parking me 700 njësi parkimi në qendër të qytetit është absurde. Shqetësim të njëjtë ka edhe për këmbësorët. Ecja në këmbë vazhdon të jetë mision i pamundur por edhe ajo me biçikletë. Krijimi i shtigjeve të reja për çiklistë në dëm të hapësirës, trotuarit për këmbësor siç është rasti tek ndërtesa e KEDS e tutje poashtu tregon për qasje përjashtuese”, u shpreh Hoxha.
Nënkryetari i PDK-së në Prishtinë, Bujar Cakolli tha se modeli i organizimit të trafikut urban dhe transportit publik ka mbetur i tillë që nga koha e qeverisjes së Ismet Beqirit në Prishtinë, ku sipas tij Vetëvendosje në të dy fushatat zgjedhore kishe premtuar zgjidhje sipas modeleve të avancuara europiane, e në fakt kjo u minimizua vetëm në blerjen me kredi të disa autobusëve.
“Margaritari i fundit i modelit qeverisës të VV-së, paralajmërimi për të vendosur taksën e hyrjes në Prishtinë për banorët e qyteteve të tjera, është një përpjekje e dëshpëruar dhe e dështuar, për të mbledhur një grusht votash. As kaq nuk do të jetë efekti i saj, ngase Prishtina, është e prishtinasve, por është edhe kryeqendra e gjithë Kosovës, jo vetëm administrative, por edhe biznesore. Duke qëndruar në Prishtinë, banorët e qyteteve të tjera i lënë asaj dhe bizneseve të saj një përqindje të lartë fitimi”, ka thënë Cakolli.
PDK në Prishtinë konsideron që Prishtina nuk e duron më këso veprime ad-hoc dhe qasje përjashtuese të vazhdueshme varësisht nga agjendat e akterëve qeverisës.
