Përurimi i ndricimit të sheshit në Podujevë ka bërë bujë të madhe në Kosovë. Qytetarët po tallen me Komunën e Podujevës, ku në vend të drunjve që ishin në shesh, janë vendosur drita, raporton Express
Sheshi i ri i Podujevës është kthyer në objekt talljeje. Qytetarët në rrjete sociale kanë shpërndarë fotografi e video duke e krahasuar Podujevën me Las Vegasin e Japoninë.
Madje, qytetarët thonë se ky shesh do t’i sjellë edhe përfitime materiale Podujevës, pasi tashmë kanë filluar edhe “ofertat” për të kaluar një fundjavë atje.
“Arrijnë turistët e parë aziatikë në qendrën e re të Ballkanit, Podujevën, thonë se kaq ndriçim s’kanë parë as në Japoni”, është një tjetër koment që është shpërndarë në rrjetet sociale.
Dikush tjetër po konsideron se dritat dhe semaforët në Podujevë janë mrekullia e tetë e Botës.
E ka të tjerë që e kanë futur Podujevën në mesin e dhjetë vendeve që duhet vizituar patjetër.
Një tjetër qytetar ka publikuar hartën e Kosovës, ku të gjitha qytetet tjera janë në errësirë, vetëm Podujeva e ndriçuar.
Në një postim tjetër në rrjetet sociale, thuhet se “The Simpsons” e kishin parashikuar ndërtimin e sheshit në Podujevë, 20 vite më parë.
Ndërkohë, punimet për ndërtimin e sheshit në qendër të Podujevës kanë filluar në janar të këtij viti.
