Kryeministri i Kosovës, Albin Kurti u shpreh se sonte nuk ka humbës, pasi që të gjithë fituan.
Kurti tha se tash e presin shumë punë të mëdha e të vështira, ku pandemia është vetëm njëra prej tyre.
Por, Kurti shprehet optimist se të gjithë së bashku do t’ia dalim.
Postimi i plotë:
Sonte fituan të gjithë, fitoi shteti i pavarur, fituan qytetarët e vendit, fitoi republika dhe demokracia, fituan deputetët dhe partitë, fitoi kuvendi dhe qeveria. Sonte nuk ka humbës. Sonte fituam të gjithë. Sepse Kosova e fitoi Presidenten e saj, znj. Vjosa Osmani-Sadriu, së cilës iu lexua emri 71 herë në raundin e tretë në Kuvend, pasi që me 14 shkurt e votuan mbi 300 mijë qytetarë.
Na presin shumë punë të mëdha e të vështira, në ditët e javët e muajt në vijim, në kushtet e një krize të shumëfishtë, ku pandemia e cila na u shtua para një viti është veçse njëra prej tyre. Por, bashkë gjithsesi do t’ia dalim, do të dalim së bashku të suksesshëm, sepse nuk do të ndalemi, sepse do të angazhohemi e kontribuojmë për interesin e përgjithshëm me vullnet të paepur.
Ju falemnderit të gjithëve. U jemi mirënjohës secilit.
