Aleanca Kosovare e Bizneseve ka bërë të ditur se nga një hulumtim që ka kryer nga data 9-12 prill, 30 mijë kosovarë e kanë lëshuar vendin dhe kanë shkuar në Shqipëri.
Secili prej tyre, sipas kësaj AKB-së, ka shpenzuar rreth 100 euro.
Kështu, kryetari i AKB-së, Agim Shahini, tha se në Shqipëri për gjatë kësaj fundjave, kosovarët shpenzuan 10 milionë euro në Shqipëri.
Shahini ka thënë se AKB ka realizuar studim nga data 9 deri me 12 prill sesa qytetarë kaluan vikendin në Shqipëri pasi që masat janë në fuqi.
“Për këto katër ditë Kosovën e kanë lëshuar 30 mijë qytetarë biznesmenë, politikanë, sportistë, zyrtarë shtetërorë që kaluan në Durrës, Tiranë duke shpenzuar rreth 100 euro në ditë ku përfshirë akomodimin, pijet, transporti, taksa rrugore. Por këto do të jenë shumë më larta sepse në këto vizita relaksuese nuk kursehet”, tha ai.
“AKB ka vlerësuar se kosovaret shpenzuan 10 milionë euro për vikend në Shqipëri, pasi qeveria mbylli qendrat tregtare, hotelet dhe kafeteritë. 90% i shpenzojnë gjithë kapitalin kur kosovarët dalin jashtë. Vetëm 5 % e vizitorëve nga Shqipëria kthehen dhe vizitojnë Kosovën kundrejt atyre që shkojnë nga Kosova. Në këtë vikend nuk ka pasur vizitorë në Kosovë për shkak të masave”, tha ai.
Shahini ka rekomanduar Qeverisë që pas datës 18 prill të lejohet puna e plotë e bizneseve.
“Prandaj AKB rekomandon qeverinë që sa më shpejt, pas datës 18, të kthejë jetën në normalitet duke zbatuar masa për kontroll, por jo masa rigoroze. AKB është e shqetësuar për përkeqësimin ekonomik në vend dhe është duke u thelluar. Ai bëri thirrje institucioneve për të siguruar vaksinën”, tha Shahini.
