Shefki Asllani, biznesmeni i njohur”, është i dyshuari për vrasjen e sotme në Tregun e Gjelbër në qytetin e Mitrovicës.
Si pasojë e kësaj ka mbetur i vrarë një 27 vjeçar me inicialet V.F. Viktima kishte ndërruar jetë në Spitalin Rajonal të Mitrovicës pasi që nuk kishte mundur t’i mbijetojë plagëve, raporton Gazeta Insajderi.
Sipas policisë nga kjo ngjarje kanë mbetur të plagsour edhe dy persona të tjerë të cilët janë duke u trajtuar në spital.
“Me të pranuar informacionin, në vendin e ngjarjes me urgjencë kanë dalë të gjitha njësitet e nevojshme policore. Nga informatat e para nga vendi i ngjarjes është kuptuar se në rast ishin përfshirë katër persona civil, ku si pasojë e të shtënave me armë zjarri nga i dyshuari mashkull kosovar, tre persona ishin plagosur të cilët me urgjencë janë dërguar në Spitalin Rajonal në Mitrovicë. Ndërkohë nga autoritetet spitalore është raportuar se njëri nga të plagosurit, viktima V. F., 27 vjeçar, si pasojë e plagëve kishte vdekur, ndërsa dy të plagosurit tjerë vazhdojnë të jenë në tretman mjekësor”, ka njoftuar Policia e Kosovës
Sipas hetimeve të deri tanishme të policisë, i dyshuari Shefki Asllani 35-vjeçar, dyshohet të ketë shtënë me armë me ç’rast është arrestuar po ashtu edhe i është ofruar ndihmë mjekësore.
“Ndërsa në vendin e ngjarjes pas ekzaminimeve të kryera, hetuesit policorë si prova materiale kanë gjetur dhe sekuestruar një armë (pistoletë), tri gëzhoja dhe dëshmi tjera materiale që ndërlidhen me rastin. Ndaj te dyshuarit Sh. A., 35 vjeçar, me vendim te prokurorit i është caktuar masa e ndalimit policor”, ka njoftuar policia.
Policia ka bërë të ditur se rrjedha hetimore është duke vazhduar në drejtim zbardhjes së plotë të të gjitha rrethanave që ndërlidhen me rastin e veprës penale: vrasje e rëndë. Trupi i pajetë i viktimës është dërguar për obduksion në IML.
Po ashtu edhe Prokuroria e Shtetit ka njoftuar se i dyshuari, Shefi Asllani është dërguar në mbajtje ndërsa ka theksuar se sëbashku me të dyshuarin ka qenë zyrtar policor.
“Prokuroria njofton opinionin se me të dyshuarin ka qenë edhe një zyrtar policor jashtë detyrës, por sipas informacioneve të para i njëjti nuk është kryerësi i vrasjes. Rasti është kualifikuar “Vrasje e rëndë”, dhe është duke u hetuar nga Prokurori i Shtetit në koordinim me Njësitin e Hetimeve Rajonale të Policisë në Mitrovicë”, thuhet në njoftimin e porkurorisë. /Insajderi.org
