Llapi.info ka raportuar dje për rastin ku një i ri nga fshati Revuçë e Komunës së Podujevës humbi jetën në vendin e tij të punës, shkruan Llapi.info.
Ai ishte duke punuar në një kompani nga Podujeva, në një objekt në dalje të Prishtinës – saktësisht në hyrje të Graçanicës.
Siç ka mësuar tutje Llapi.info, i ndjeri, bashkë me kolegët e tij, ishin duke punuar në objektin e madh të ‘Prishtina Mall”, në momentin kur ka ndodhur ngjarja tragjike.
Rrethanat e vdekjes ende nuk dihen derisa të dalin raportet e Institutit të Mjekësisë Ligjore.
“Me urdhër te prokurores kujdestare trupi është dërguar në obduksion në Institutin e Mjekësisë Ligjore, si dhe rasti është cilësuar hetim mbi vdekjen e që vazhdon të trajtohet”, ka thënë zëdhënësja e Gjykatës Themelore të Prishtinës, Laureta Ulaj, për klankosovatv.
Viktima, ish-veteran i Ushtrisë Çlirimtare të Kosovës, që u varros të premten në Revuqë të Podujevës, sipas familjarëve, nuk kishte probleme shëndetësore.
“Me ato informacione që i dimë, veç na kanë thirre që është lënduar, o vra edhe qikaq ma shumë nuk dimë. Është marrë me Bujqësi, sa ka qenë koha e luftës ka qenë ushtarë i UCK-së edhe pas lufte nja 4 vite në TMK”, deklaroi vëllai i të ndjerit, Ali Dibrani.
Avni Dibrani ka lënë prapa bashkëshorten, vajzën 17 vjeçare dhe djalin 10 vjeçar./Llapi.info
