Drejtoria për Planifikim dhe Zhvillimit Ekonomik në Podujevë ditë më parë ka organizuar një tryezë për t’i prezantuar njërën nga projektet më madhore në Llap, shkruan Llapi.info.
Bëhet fjalë për ndërtimin e Zonës Industriale. Për këtë, komuna ka diskutuar me pronarë të bizneseve.
Në takim morën pjesë Kryetari i Komunës së Podujevës, Shpejtim Bulliqi, ministrja e Ministrisë së Industrisë, Ndërmarrësisë dhe Tregtisë. Rozeta Hajdari, nënkryetarja Marigona Lahu dhe drejtorët e drejtorive përkatëse. Se kur pritet të nis ky projekt, komuna, deri më tani, nuk ka dhënë ndonjë datë të caktuar.
Por, çka thoshte Bulliqi për Zonën Industriale gjatë fushatës zgjedhore, ku edhe pati bërë premtimin për ndërtimin e saj?
Bulliqi ishte shprehur se ky projekt do ta transformojë Podujevën, ku është projektuar me 49 parcela.
“Është projekti që transformon dhe zhvillon komunën. Duke qenë në kufi dhe buzë rrugës që lidhin Kosovën me Evropën, ky projekt do ta shndërroj Podujevën në portën e zhvillimit industrial të të gjithë vendit. Zona Industriale e projektuar në 49 parcela, me hapësira nga 6000 në 7000 metra katrorë, do të ofroj gjithë infrastrukturën dhe hapësirën e nevojshme për prodhuesit tanë, për afaristët nga mërgata dhe gjithë investitorët e huaj që duan të investojnë në Podujevë. Realizimi i zonës do ta transformoj ekonominë tonë, duke krijuar vende pune për të rinjtë e komunës sonë. Në kuadër të zonës do të zhvillohen veprimtari të ndryshme, me theks në industrinë përpunuese, servise dhe shërbime, shoëroome për bizneset prodhuese ekzistuese etj. Do të ketë gjithashtu hapësira për rekreacion, parqe, gastronomi dhe hapësirat për administratën e zonës”, pati shkruar ai./Llapi.info
Më poshtë pamjet se si do të duket:
