Me rastin e 7 Marsit, kryeministri i Kosovës, Albin Kurti, i ka uruar të gjithë mësimdhënësit për Ditën e Mësuesit.
Ai tha se në këtë ditë vizitoi familjen Dobruna në Gjakovë, në shtëpinë e së cilës është lindur mësuesja e tij e parë, Nafije Dobruna Deva.
“Në mëngjesin e sotëm isha për vizitë te familja Dobruna në Gjakovë, në shtëpinë në të cilën është lindur mësuesja ime e parë, Nafije Dobruna Deva. Evokuam kujtime të shumta e të paharrueshme me vajzën e mësueses, Afërditën, në këtë shtëpi të vjetër më shumë se dy shekuj, e ku tani banon kolegu im nga qeveria, Agon Dobruna, zëvendësministër i Financave, Punës dhe Transfereve”, ka shkruar Kurti.
Dhurata e Kryeministrit Albin Kurti për, Afërditën, vajza e mësueses së tij të parë në Gjakovë
Ai ndau fjalë miradije për mësuesen e tij të parë dhe se sa punë të zellshme kishte bërë ajo.
Përmes një postimi në rrjetin social “Facebook”, Kurti ka shkruar se “Mësuesja Nafije ishte kombinimi i përsosur i disiplinës dhe dashurisë: sado nxënës i mirë të kesh qenë, asnjë pesëshe nuk ka qenë e kollajshme. Ajo ka dhënë një kontribut të pamatshëm për arsimimin, edukimin e formimin tim, krahasueshëm me nënën time”.
“Jeta e saj ka qenë e vështirë. Babai, Ismaili, i internuar për dy vjet në burg në Vjenë si NDSh-ist gjatë Luftës së Dytë Botërore, pas së cilës bie në varfëri meqë pushteti i atëhershëm ia rrëmben pasurinë. Ai vdes pak vjet më pas. Nëna, Qazimja i rrit pesë fëmijë jetim. Më e madhja, Nafija, e mbaron Shkollën Normale dhe bëhet mësuese”.
Kurti tregoi edhe çfarë i dhuroi vajzës së mësueses së tij.
“Përveçse një buqetë me lule, Afërditës ia dhurova fotografinë e klasës I/4 me mësuesen Nafije, nga qershori i vitit 1982. Mandej, nga klasa e dytë fotografitë zënë e bëhen me ngjyra”.
