Gazetari kosovar, Zijadin Gashi, ka vdekur mëngjesin e sotëm.
Lajmin e kanë bërë të ditur familjarët përmes rrjeteve sociale.
“Të dashur familjarë e miq, Me dhimbje të thellë ju njoftojmë që sot më 3.12.2024 ndërroi jetë më i dashuri ynë, Zijadin Gashi. Varrimi do të bëhet sot në varrezat e qytetit të Prishtinës në kohën e ikindisë, ora 14:00”, thuhet në njoftimin e familjarëve të tij.
Zijadin Gashi pak muaj më parë i ishte nënshtruar një ndërhyrjeje kirurgjike në tru.
Atë kohë vetë gazetari Gashi kishte njoftuar se operimi ka rezultuar i suksesshëm dhe se pret që t’i kalojë edhe sfidat pas operacionit, duke shpresuar se një ditë do t’i rikthehet edhe profesionit.
Zijadin Gashi ka qenë pjesë aktive e gazetarisë kosovare para dhe gjatë luftës, kurse edhe pas çlirimit punoi në disa prej mediumeve të shkruara e elektronike në Kosovë.
Së fundmi, Asociacioni i Gazetarëve të Kosovës, kishte ndarë mirënjohje për Gashin, pikërisht për kontributin e dhënë në gazetari, gjatë periudhave të vështira të Kosovës.
Siç ka njoftuar familja, varrimi i të ndjerit do të bëhet sot në varrezat e qytetit të Prishtinës, ora 14:00.
