“Mëso dhe Reciklo” është emri i projektit të një grupi të të rinjëve nga Podujeva të cilët kanë filluar të shpërndajnë shporta për klasifikimin e mbeturinave nëpër shkollat e qytetit të Podujevës, njofton Llapi.info.
Shpërndarja e shportave ka filluar sot në shkollën fillore të mesme të ulët “Hasan Ramadani” në fshatin Shajkofc, si dhe në Sh.F.M.U “Xheladin Rekaliu” në Podujevë, ndërsa në ditët në vijim shporta të njëjta do të shpërndahen edhe në shkollat SH.F.M.U “Ibrahim Rugova”, SH.F.M.U “Shaban Shala”.
Në secilën shkollë do të vendosen nga 3 kontejnerë në të cilët do të mbledhen mbeturinat, dhe nga 3 shporta në secilën klasë, shportat do të ndahen në Letër, Plastikë dhe Metal.
Këtë për Llapi.info e ka bërë të ditur kryesuesi i këtij projekti, Arben Neziri i cili ndër të tjera tregoi se ky projekt financohet nga UNICEF-i.
“Grupi ynë ka fituar projekt pas një Workshop-i të organizuar nga UNICEF – Innovations Lab Kosovo në të cilin 6 prej 12 grupeve kanë qenë fitues të një projekti prej 2000 eurosh, qëllimi i projektit tonë është që të bëhet vetëdijesimi i nxënësve të shkollave fillore të qytetit tonë në lidhje me klasifikim të mbeturinave dhe reciklim të tyre.”- tha Neziri për Llapi.info.
Antarët e këtij projekti: Arben Neziri, Ajet Haliti, Bledian Potera, Erita Mani dhe Kada Mulolli prezantuan para nxënësve të këtyre shkollave projektin e tyre dhe pastaj vendosen shportat për klasifikimin e mbeturinave nëpër klasët e shkollave.
Projekti “Mëso dhe Reciklo” përpos që do të rezultojë me një ambient më të pastërt, antarët e këtij projekti kanë vendosur që ky projekt të jetë një lloj gare pasi që shkolla se cila do të mbajë ambientin e saj më të pastër dhe të klasifikojë më shumë mbeturina do të shpërblehet me ndonjë dhuratë të përcaktuar nga grupi.
Gjatë këtyre aktiviteteve përpos zyrtarëve të shkollave përkatëse të pranishëm ishin edhe Valon Nushi përfaqësues nga UNICEF – Innovations Lab Kosovo dhe drejtori i kompanisë së pastrimit “Natyra” Faik Haliti./Llapi.info
