Shqiptarët në Diasporë çdo ditë e më shumë po avancojnë në të gjitha pikëpamjet. Ajo çka na gëzon më së shumti, është se djemtë tanë atje, kanë filluar në numër të madh të ulen në amfiteatrot e universiteteve më të njohura të Perëndimit për t’u aftësuar denjësisht barabartë me vendasit e shteteve ku ata jetojnë. Këta individë me sukseset e tyre po bëhen ambasadorë të denjë të kombit shqiptar.
Një rast i tillë është edhe i riu Drilon Mehmeti me origjinë nga Kosova, familja e të cilit ka jetuar në Podujevë.
Driloni para pak kohësh ka diplomuar në shkencat politike pranë Universitetit të Göttingenit. Falë sukseseve të tij në studime dhe talentit që ka si një politolog, partia më e madhe në Gjermani CDU, i ka ofruar mundësinë që të jetë pjesë e listës zgjedhore të Komunës së Northeimit si kandidat për asamblist në Kuvendin e kësaj komune.
Drilon Mehmeti është i biri i mjeshtrit të madh të pikturës në grafit, Hysni Mehmeti.
Kjo familje jeton një kohë të gjatë në Gjermani, të cilët janë integruar me plot sukses në rrjedhat jetësore të atij shteti, duke mos e harruar për asnjë çast kombin dhe vendlindjen e tyre, prej nga e kanë origjinën. /DritarjaOnline/
