Aleanca Kosova e Re, dje në Podujevë ka mbajtur takim me anëtarë dhe simpatizantë të saj, para të cilëve prezantoi programin politikë për këtë qytet, njofton Llapi.info.
Në emër të kësaj dege foli kryetari i degës, njëherë kandidat për deputet në Kuvendin e Kosovës, Avdullah Mehmeti, i cili ndër të tjerash bëri thirrje për mobilizim nga bashkë-partiakët e tij në Podujevë për të fituar besimin e qytetarëve në zgjedhjet e 6 tetorit.
“Aleanca Kosova e Re ofron program kualitativ, që respekton qytetarët e Kosovës, e në veçanti për rininë tonë. AKR është e dëshmuar për sinqeritet, për punë me plot vullnet dhe korrektësi”, deklaroi Mehmeti.
Nga niveli qendror para të pranishmëve foli deputeti, Islam Pacolli, i cili ndër të tjerash tha se Podujeva ka qenë e anashkaluar me vite.
“Unë kam ngritur zërin për ju në Kuvendin e Kosovës për shumë çështje për mirëqenien e qytetarëve të Podujevës dhe këtë do të vazhdoj ta bëjë me besimin dhe përkrahjen tuaj”, tha Pacolli.
Të pranishmit me një fjalë rasti i përshëndeti edhe sekretari i AKR-së, Vesel Makolli, i cili falënderoi anëtarët dhe simpatizantët e AKR-së dega në Podujevë për kontributin e tyre që po japin për fuqizimin e vlerave liberale në këtë qytet./Llapi.info
