Një vetë-aksident trafiku ka ndodhur të dielën mbrëma në fshatin Bajçinë të Podujevës, ku për pasojë dy rinj humbën jetën, raporton Llapi.info
Rastin e ka konfirmuar edhe Policia e Kosovës në raportin e saj. Sipas PK-së, vetura e cila ka humbur kontrollin ka dalë jashtë rrugës e përmbysur.
“Është raportuar se i dyshuari mashkull K/Shqiptar duke drejtuar automjetin e tij nga pakujdesia dyshohet se ka humbur kontrollin duke përfunduar jashtë rruge. Si pasoj lëndime trupore ka pësuar një mashkull K/Shqiptar i cili është dërguar në QKUK për trajtim mjekësor ndërsa lëndime vdekje prurëse ka pësuar viktima mashkull K/Shqiptar. Me vendim të prokurorit trupi i pajetë i viktimës është dërguar në IML për obduksion. Rasti vazhdon të hetohet”, ka thënë Policia në raportin e së hënës.
Si pasojë e këtij aksidenti në vend ngjarje mbeti i vdekur një 19 vjeçar, J.G., nga fshati Dobërdol i cili u varros të hënën, ndërsa u lëndua një tjetër që u dërgua me urgjencë në QKUK. Fatkeqësisht, as ky i fundit nuk arriti t’i mbijetojë plagëve. Ç.G., 19 vjeç, ndërroi jetë dje në QKUK. Rastin e ka konfirmuar edhe Policia e Kosovës.
“Rreth orës 16:30 jemi njoftuar nga QKUK, se ka ndërruar jetë personi i cili është lënduar në aksidentin që ka ndodhë me datën 28 prill 2019 në fshatin Bajçinë të Podujevës. Bëhet fjalë për viktimën mashkull Ç.G. 18 vjeç”, ka thënë zëdhënësja e Policisë për rajonin e Prishtinës, Florie Ahmeti-Haziraj.
Megjithatë, nuk janë vetëm këtë të rinj viktima të aksidenteve gjatë këtij viti në Podujevë. Në vetëm në muajin mars dy persona në trafik humbën jetën. Më 7 mars në QKUK ndërroi jetë një i moshuar i cili u godit nga një kamion më 22 shkurt të këtij viti në fshatin Lluzhan.
Vetëm dy ditë më vonë, në fshatin Shtedim një këmbësor e pësoi nga një garë mes dy veturave. Dy vetura të cilat dyshohet se kishin bërë garë, njëra kishte dalë nga rruga kështu duke e goditur për vdekje një 73 vjeçar.
Aksidenti në Shtedim
Ndërsa, dy persona vdiqën në janar nga aksidenti i ndodhur më 31 dhjetor në magjistralen Prishtinë – Podujevë, konkretisht në fshatin Penuhë.
Babë e vajzë ndërruan jetë nga aksidenti fatal i ndodhur në ditën e fundit të vitit 2018.
Ndërkohë, rrugët e Kosovës vazhdojnë të jenë të gjakosura nga aksidentet e shumta. Se që aksidentet janë në numër të madh e thonë edhe nga Policia e Kosovës.
Por sa kanë ndodhur në rajonin e Podujevës gjatë vitit 2018?
Në bazë të statistikave të Policisë së Kosovës dërguar për Llapi.info, vetëm në rajonin e Podujevës gjatë vitit 2018 kanë ndodhur 292 aksidente. Prej tyre, 3 ishin me fatalitet dhe 243 me të lënduar.
Lexo edhe: Viti 2018, 292 aksidente në Podujevë, 3 të vdekur e 243 të lënduar
“Në rajonin e Podujevës në vitin 2018 kanë ndodhur gjithsejtë: 292 aksidente, prej tyre: 3 aksidente me pasoja fatale, 243 me lëndime trupore dhe 46 me dëme materiale. Shkaktarë të këtyre aksidenteve, shpejtësia (183), mos mbajtja e distancës (43), pa kujdesia (50), kthimi i pa sigurt (3), tejkalim (1) dhe ndërrimi i shiritit (1)”, është thënë në përgjigjen e zyrës për marrëdhënie me publikun dhe media të Drejtorisë Rajonale të Policisë -Prishtinë.
Ndryshe, Policia vazhdimisht është duke apeluar për kujdes të shtuar nga të gjithë pjesëmarrësit në komunikacion, derisa masa për parandalimin e aksidenteve kanë bërë edhe krerët e shtetit.
Po ashtu, Policia e Kosovës po aplikon masa rigoroze ndëshkuese ndaj të gjithë shkelësve të ligjit të trafikut, me të vetmin qëllim për ngritjen e nivelit të sigurisë në trafik dhe parandalimin e aksidenteve rrugore në përgjithësi./Llapi.info
