Ngritjen e aktakuzës ndaj zyrtarëve të Shtetit që gjuajtën me armë në odën e Limajt e ka konfirmuar prokurori, Ismet Tofaj.
“Është ngritur aktakuza ndaj gjashtë personave”, ka thënë Tofaj, për Gazetën Express.
Prokurori i Prokurorisë Themelore në Gjakovë nuk ka pranuar të japë detaje të tjera duke përsëritur se aktakuza është ngritur për gjashtë persona të përfshirë në gjuajtje me armë në Banjë të Malishevës.
Zëvendëskryeministri Dardan Gashi, ish-Kryetari i Skenderajt Sami Lushtaku, Endrit Shala ishin xhiruar teksa kishin gjuajtur me armë në ditën kur Fatmir Limaj ishte shpallur i pafajshëm nga të gjitha akuzat sa ishte Ministër i Transportit.
Ramush Haradinaj, Kryeministër i Republikës, kishte arsyetuar zyrtarët e Shtetit që kishin gjuajtur me armë. Krejt këtë e kishte ndërlidhur me traditën e shqiptarëve.
Ndërkohë, vetëm këtë vit nga plumbat qorr kanë humbur jetën katër qytetarë të Kosovës.
Pas publikimit të xhirimeve ku shihen zyrtarët duke gjuajtur me armë nga dritarja e odës së LImajve, Dardan Gashi kishte thënë se ka gjuajtur me armë. Por, kishte thënë se nuk i kujtohet ku dhe për çfarë arsye.
Ndërkohë, edhe Sami Lushtaku kishte pranuar se ka gjuajtur me armë. Por, ka thënë se arma ishte joreale dhe me gaz.
Pas publikimit të pamjeve ku shihen zyrtarët e shtetit duke gjuajtur me armë kishin nisur hetimet. Policia kishte marrë në pyetje të dyshuarit, ndërkohë, pesë muaj më vonë rezultoi me aktakuzë.
Përpos tre zyrtarëve të Shtetit, Prokuroria ka ngritur aktakuzë edhe ndaj tre personave të tjerë.
Prokurori nuk i ka dhënë emrat e gjithë të akuzuarve.
