Prokuroria themelore me datën 12 tetor 2017 ngriti aktakuzë kundër Ramës.
Në aktakuzën e prokurorit Enis Gashi thuhet se më 14 nëntor 2016, gjatë inspektimit nga Komisioni i Pavarur për Miniera dhe Minerale ka hasur operatorin ekonomik “Arbri-EB” SH.P.K, pronë e të pandehurit, pa leje përkatëse.
Sipas aktakuzës, i pandehuri ka operuar ilegalisht në shfrytëzimin e resurseve minerale, rërës dhe zhavorrit në mënyrë ilegale, duke qenë në kundërshtim kështu me Ligjin për Miniera dhe Minerale.
Edhe përkundër faktit se në këtë çështje mungoi përfaqësuesi i palës së dëmtuar-Komisionit të Pavarur për Miniera dhe MInerale, shqyrtimi vazhdoi me leximin e aktakuzës.
Menjëherë pasi prokurori e lexoi akatakuzën, i akuzuari Rama në praninë e gjykatësit Mentor Bajraktari deklaroi se “e pranon fajësinë bashkë me pendimin lidhur me këtë veprim”.
Po ashtu i akuzuari i paraqiti gjykatës një kopje të faturës prej 5000 mijë eurove që tha se ia kishte paguar Komisionit të Pavarur për Miniera dhe Minerale për dëmin e shkaktuar.
I njëjti theksoi se e ka marrë licencën nga ana e KPMM-së dhe se në të ardhmen nuk do të përsëriten veprime të ngjashme.
I akuzuari kishte kryer vepren penale të aktivitetit të jashtëligjshëm minerar, pa posedimin e një licence ose leje të lëshuar nga Komisioni i Pavarur për Miniera dhe Minerale.
Për shkak të këtij aktiviteti ilegal Ali Rama u dënua me gjobë prej 600 eurove si dhe me shpenzimet e procedures.
