Hetem Ajeti bashkërisht me Komitetin e Fshatit kanë iniciuar një projekt për themelimin e një pllake përkujtimore për dëshmorët dhe martirët e këtij fshati. Inciativë kjo e cila ishte propozuar vitin e kaluar mirëpo që Komiteti ka pushuar e që më vonë është kyqur Hasan Visoka me të cilin janë duke e vazhduar këtë projekt dhe duke kontaktuar me njerëzit për ndihmë, shkruan Llapi.info.
Në këtë pllakë përkujtimore sipas iniciatorëve do të vendosen vetëm emrat e të rënëve të luftës së fundit dhe disa nga emrat e njerëzve të cilët kanë dhënë kontribut para dhe pas luftës.
Njëri prej iniciatorëve të kësaj pllake Hetem Ajeti tha për Llapi.info se edhe pse kushton shumë, komuna e Podujevës nuk i ka ofruar ndihmë.
“Pllaka është duke u punuar dhe besoj se në fund të këtij muaji do të përurohet duke pasur parasysh faktin që shkolla fillore e këtij fshati feston ditën e saj. Ky projekt ka kushtuar shumë. Komuna nuk na ka ndihmuar edhe pse e kemi dërguar një kërkesë para se me fillu punën, mirëpo Komuna ka thënë nuk kemi mundësi me i’u ndihmu, mandej e kemi marrë inciativë na vetë nëse mundemi me i’a dalë edhe pse besoj se do i’a dalim. Ky projekt kushton dikun rreth 11 mijë euro, duke pasur parasysh të gjitha elementet që shkojnë së bashku me të nga zhavori e deri te ndriçimi. Pak a shumë njerëzit i kemi informuar, i’u kemi kërkuar kush ka mundësi për të ndihmuar, nuk kemi caktuar çmim por vetëm kush sa mundet” ka thënë Ajeti.
Në anën tjetër, shefi i Zyrës për Informim në Komunën e Podujevës bëri të ditur për Llapi.info se Drejtoria e Planifikimit Urban do të shqyrtojë mundësitë buxhetore në përkrahje për ndërtimin e kësaj pllake.
“Banorët e fshatit Sfeçël para disa ditësh i janë drejtuar Drejtorisë së Planifikimit Urban dhe Mbrojtjes së Mjedisit me një kërkesë për të ndihmuar në projektin e ndërtimit të pllakës përkujtimore për dëshmorët e rënë. Kjo drejtori do të shqyrtojë mundësitë buxhetor për përkrahjen e këtij projekti.” ka thënë Elezi.
Kujtojmë, kjo pllakë sipas iniciatorëve pritet të përurohet për ditën e shkollës/Llapi.info
