Sot në Komunën e Podujevës është mbajtur takimi i parë i Grupit Punues për hartimin e Planit Komunal te Veprimit për Efiçiencën e Energjisë me përfaqësues të GIZ-it dhe të kompanisë konsulente “Lins 4”, njofton Llapi.info
Sipas një njoftimi të komunës, ky takim është realizuar mbi bazën e Memorandumit të nëshkruar nga komuna dhe GIZ-it.
“Takimi është realizuar mbi bazën Memorandumit të nënshkruar në mes të Komunës së Podujevës dhe GIZ-it Gjerman për realizimin e Pilot Projekt GIZ-KEEP “Krijimi i sistemit për menaxhim të energjisë në nivel lokal”. Në takimin e sotëm ishin të pranishëm Menaxheri i Zyrës për Energji në Komunën e Podujevës, Rasim Fejza, drejtori i Shërbimeve Publike, Faik Muçiqi dhe anëtarë të grupit punues nga drejtoritë përkatëse komunale si dhe përfaqësuesit e GIZ-it, Maliq Pireci dhe zonja Meral Hallaqi – ekspertë për Efiçiencë të Energjisë dhe përfaqësuesja e kompanisë konsulente “Lins 4”, zonja Nafie Gashi” thuhet në kumtesën e komunës.
Në këtë takim me qëllim të realizimit të projektit u kontraktua kompania “Links 4” e cila sipas këtij njoftimi do të filloj menjëherë me aktivitete.
“Gjatë takimit u diskutua lidhur me krijimin dhe funksionalizimin e Sistemit komunal për menaxhimin e energjisë, mbledhjen e të dhënave në terren për ndërtesat komunale dhe ndriçimin publik, mbështetjen e Menaxherit komunal të energjisë për vendosjen e të dhënave në softverin ENMASOFT si dhe në krijimin e Planit Komunal të Veprimit për Efiçiencë të Energjisë (PKVEE). Me qëllim të realizimit të pilot projektit GIZ-KEEP është kontraktuar kompania “Links 4”, e cila do të fillojë menjëherë me aktivitetet, bashkë me Grupin Punues për Hartimin e Planit Komunal të Veprimit për Efiçiencën e Energjisë. Në këtë takim gjithashtu u bisedua për aktivitetet që do të zhvillohen për mbledhjen e të dhënave që lidhen me konsumin e energjisë nga ndërtesat publike komunale dhe ndriçimi publik në Podujevë. Gjithashtu u fol për detyrat dhe përgjegjësitë e secilit partner si dhe informata rreth softverit ENMASOFT dhe hapat e mëtutjeshëm dhe dinamika e implementimit të projektit.” përfundon njoftimi i komunës së Podujevës./Llapi.info
