Ejup Ibrahimi nga Prishtina është gjobitur nga Policia e Kosovës me një gjobë trafiku në vlerë prej 6,000 euro.
Të paktën kështu tregojnë të dhënat e sistemit elektronik për Qasjen e Kontrollimit të Tiketave në Trafik, e dizajnuar për t’ju lehtësuar punën qytetarëve.
Mirëpo Ibrahimi ka deklaruar se një gjobë prej 30 euro është paguar mirëpo ende nuk është fshirë nga sistemi, ndërsa asnjëherë nuk ka pranuar gjobë prej 6,000 euro.
Sipas Qamil Behramit nga Trafiku Rajonal gjobat të cilat shqiptohen nga Policia për personat fizik maksimalisht mund të jenë në vlerë prej 500 euro. Ndërsa sa u përket personave juridik vlera maksimale është 1,000 euro.
Në fotografinë e dërguar nga Ibrahimi shihet se satatusi i gjobës është “ende në polici” që nënkuton se kjo gjobë nuk është proceduar akoma në gjykate, andaj edhe kjo shifër pretendohet të jetë gabim.
Kujtojmë se gjatë ditëve të fundit ka pasur ankesa për vonesat e fshirjes së gjobave në këtë sistem, i cili aktualisht është në fazën testuese.
Më poshtë gjeni të dhënat e dërguara nga shikuesi i Klan Kosovës, gjoba e të cilit kap shifrën 6,000 euro.
