Gjykata e Apelit e Kosovës e ka refuzuar si të pabazuar ankesën e avokatit mbrojtës kundër caktimit të masës së paraburgimit prej një muaji, për të dyshuarin Asllan Bajraktari.
Në këtë mënyrë gjykata e shkallës së dytë, e ka lënë në fuqi aktvendimin e 9 gushtit të Gjykatës Themelore në Mitrovicë – Dega në Skenderaj.
Bajraktari, imam në xhaminë e fshatit Jashanicë të Klinës, po dyshohet nga ana e prokurorisë se ka kryer veprën penale “Kanosje” nga neni 185, paragrafi 3 i Kodit Penal të Republikës së Kosovës, si dhe veprën penale ”Mbajtje në pronësi, kontroll ose posedim të paautorizuar të armëve” nga neni 374, paragrafi 1, i të njëjtit ligj.
Gjykata e Apelit gjen se gjykata e shkallës së parë, ka dhënë arsye të mjaftueshme, mbi bazën ligjore për të cilën ka caktuar masën e paraburgimit ndaj tij, konform dispozitave të nenit 187 të Kodit të Procedurës Penale të Republikës së Kosovës, thuhet në komunikatën e Gjykatës së Apelit.
