Sindikata e Pavarur e Hekurudhave të Kosovës, Trainkos, i ka dhënë afat Qeverisë së Kosovës që deri më datën 17 maj të kryejë pagesën e punëtorëve për muajin prill të këtij viti.
Përmes një njoftimi, Trainkos bën të ditur se të premten në stacionin hekurudhor në Fushë Kosovë do të mbajë protestë 1-orëshe, ku do të ndalet edhe qarkullimi i trenit Prishtinë-Pejë, transmeton Indeksonline.
Më poshtë gjeni njoftimin e plotë të kësaj Sindikate:
Trainkos Sh.A. në mbledhjen e mbajtur me datën 15.05.2018 (e Martë), me punëtorët e kompanisë Hekurudhat e Kosovës – Trainkos Sh.A. në lidhje me vonesën e pagave për muajin Prill 2018, përmes kësaj shkrese njofton të gjitha mediat se Menaxhmentit të kompanisë HK – Trainkos Sh.A. i ka dhënë kohë që deri të enjten me datën 17.05.2018 të bëjë pagesën e pagave për punëtorë për muajin Prill 2018.
Duhet theksuar se me datën 18.05.2018 (e Premte), nga ora 08:00 deri në ora 09:00, në stacionin hekurudhor të Fushë Kosovës, do të mbahet një protestë 1 orëshe ku do të ndalet edhe qarkullimi i trenit Prishtinë – Pejë, në shenjë pakënaqësie për vonesën e pagave. Kjo është vetëm një masë paralajmëruese për veprimet e tjera sindikale të cilat do të pasojnë pas datës 18.05.2018.
Ne si Sindikatë, nuk kemi asnjë njoftim zyrtar (në formë të shkruar) nga Menaxhmenti i kompanisë në lidhje me arsyen e vonesës së pagave për muajin Prill 2018, ndonëse kemi kërkuar që të marrim një njoftim zyrtar nga ana e tyre.
Sindikata ka pasur mirëkuptim për vonesë të pagave deri me datën 14.05.2018, ndonëse në kontratë kompania është e obliguar që pagesën e pagave ta bëjë deri me datën 05 të muajit vijues.
Sindikata e Pavarur e Hekurudhave – Trainkos Sh.A. kërkon nga udhëtarët që të kenë mirëkuptim për ditën e Premte me datë 18.05.2018, ku treni i mëngjesit në linjën Prishtinë – Pejë, do të ketë vonesë 1 orëshe.
