Një djalë me këmbë në tokë në përditshmëri ka nisur një rrugëtim yjor në artin e tij.
Të premten në Bibliotekën Kombëtare të Kosovës është hapur ekspozita e piktorit Hekuran Sokoli, “Rrugëtimi Astral”.
Ai punimet e kësaj ekspozite i ka bërë përmes teknikës vaj në pëlhurë, ku ka elemente mekanike si pasojë e përvojës së tij me shtypshkronjë por spikat edhe afiniteti i tij për të vënë në përdorim format gjeometrike për ta shprehur imagjinatën e tij.
Janë gjithsej 16 piktura të cilat vizitorët kanë mundësinë t’i sodisin, po edhe t’i shoshitin në kërkim të sihariqeve të mbjella nga Sokoli.
Kurator i kësaj ekspozite është Musa Kalaveshi, ndërkaq fotografitë e ekspozitës i kanë shkrepur Faton Ademi dhe Bleron Llugiqi.
