Instituti Demokratik i Kosovës (KDI), përmes këtij reagimi, ka shprehur shqetësimin lidhur me gjuhën denigruese të përdorur, në veçanti të dy ditëve të fundit, në seancat plenare të Kuvendit të Kosovës.
“Është e papranueshme që deputetët e Kuvendit të fyejnë njëri-tjetrin dhe të përdorin gjuhë misogjene. Kuvendi i Kosovës, si institucioni më i lartë i shtetit, duhet të shërbejë si vend ku promovohen vlerat e demokracisë, të drejtat e njeriut dhe barazia gjinore, e jo të shndërrohet në arenë ku përplasjet dhe fyerjet janë normale”, thotë KDI.
KDI i bën thirrje të gjithë deputetëve që t’i japin fund gjuhës joparlamentare dhe të përmbahen nga fyerjet e vazhdueshme, ndërsa kërkon që të ndërmerren masa të menjëhershme ndaj deputetëve që përdorin gjuhë joparlamentare.
“Kuvendi i Kosovës nuk duhet të kthehet në arenë të qërimit të hesapeve personale duke përdorur akuza të ndërsjella dhe diskurs denigrues, që bie ndesh me obligimet kushtetuese të të zgjedhurve”, deklaron KDI.
Diskutimet në Kuvend, sipas këtij Instituti, duhet të orientohen në adresimin e çështjeve me interes ekonomik, social e politik për qytetarët e vendit.
