Misioni i KFOR-it në Kosovë ka treguar se në ditë në vijim do të bëjë zëvendësimin e shenjave ekzistuese përgjatë vijës së kufirit administrativ me Serbinë, pasi që ato shenja janë vjetërsuar dhe dëmtuar si rezultat i ndryshimeve të motit.
Në një komunikatë për media misioni paqëruajtës në Kosovë thotë se këto shenja shërbejnë vetëm për personelin e KFOR-it dhe UNMIK-ut dhe jo për qytetarët e Republikës së Kosovës.
Ndër të tjera në këtë njoftim thuhet se KFOR- nuk merret me diskutimet aktuale politike që po bëhen rreth kufijve.
“Në ditët në vijim, KFOR-i do të vazhdojë t’i zëvendësojë shenjat ekzistuese përgjatë vijës së kufirit administrativ. Ky aktivitet është i domosdoshëm për të gjitha shenjat që janë në gjendje shumë të keqe, për shkak të dëmtimeve si rezultat i motit”, përcjellë Klan Kosova.
Këto shenja shërbejnë vetëm për paqeruajtësit dhe pjesëtarët e UNMIK-ut, për t’u orientuar në mënyrë që të mos e thyejnë marrëveshjen me Forcat e Armatosura të Serbisë rreth kalimit të vijës kufitare administrative pa dashje.
“Shenjat e vendosura përgjatë vijës së kufirit administrativ janë VETËM referenca për personelin e KFOR-it dhe të UNMIK-ut, jo për qytetarët e Kosovës. Shenjat paralajmëruese e tregojnë distancën nga vija e kufirit administrativ, në mënyrë që personeli i KFOR-it dhe i UNMIK-ut mos t’i shkelin marrëveshjet me Forcat e Armatosura të Serbisë duke e kaluar vijën e kufirit administrativ pa dashje”.
Sipas KFOR vija administrative shërben vetëm për referencë ushtarake, dhe nuk ka të bëjë me kufijtë zyrtarë të Kosovës.
“Vija e kufirit administrativ është një vijë referencë, e vendosur për qëllime ushtarake dhe nuk ka të bëjë me kufijtë zyrtarë të tashëm apo të ardhshëm. Vija e kufirit administrativ dhe shenjat nuk ndikojnë në jetën dhe aktivitetet e qytetarëve në Kosovë”.
