Prokurorja Drita Hajdari, disa vite pas rrjedhjes në publik të përgjimeve të njohura si afera “Pronto”, ka arritur të ndjekë penalisht 11 zyrtarë dhe persona të afërt me PDK-në. Ajo, të premten, ka ngritur aktakuzë ndaj dy ish-shefave të grupit parlamentar të PDK-së, Adem Grabovci dhe Zenun Pajaziti. Po ashtu, në mesin e 11 të akuzuarve janë edhe ministri i Inovacionit, Besim Beqaj, Fatmir Shurdhaj, Njazi Kryeziu dhe zyrtarë të tjerë të PDK-së
Adem Grabovci, që veten e quante shef i shefave, në një nga përgjimet “Pronto”, do të ulet shumë shpejt në bankën e të akuzuarve në Gjykatë. Kjo, pasi Prokuroria Speciale ka ngritur aktakuzë ndaj tij dhe 10 zyrtarëve e njerëzve të afërt të PDK-së për punësime me nepotizëm.
Bashkë me Grabovcin, në të njëjtën aktakuzë përfshihet edhe ministri i Inovacionit, Besim Beqaj, sikurse edhe deputeti aktual i PDK-së, Zenun Pajaziti, dhe zyrtarët të tjerë Fatmir Shurdhaj, Njazi Kryeziu etj.
Pjesë e aktakuzës janë edhe Ilhami Gashi, Sedat Gashi dhe Arbenita Pajaziti, Xhavit Dakaj, raporton Gazeta Express.
“Prokuroria Speciale e Republikës së Kosovës, sot ka ngritur aktakuzë në rastin e quajtur “Pronto”. Në këtë çështje penale janë të akuzuar njëmbëdhjetë persona me funksione të larta zyrtare: ish-deputeti A.G., ministri aktual B.B., deputeti aktual Z.P., dy ish-sekretarë të përgjithshëm I.G. dhe Xh.D., ish-zëvendësministër F.Sh., këshilltari politik në MPB S.G., ish-drejtori i Bordit të ndërmarrjes publike “Radoniqi-Dukagjini” në Gjakovë I.N., ish-drejtori i Bordit të ndërmarrjes publike Hidro-Drini” në Pejë R.A., ish-kryesuesi i Kuvendit të Komunës së Prizrenit N.K. dhe ish-shefja e Njësisë për furnizim në Ministrinë e Shëndetësisë A.P”, ka njoftuar të premten Prokuroria Speciale.
Aktakuza është ngritur nga prokurorja speciale Drita Hajdari, e cila deri më tash është njohur për ndjekje penale të njerëzve të pushtetshëm, si në rastin e Fatmir Limajt për krime lufte, raporton Gazeta Express.
Prokurorja Hajdari kishte ndjekur penalisht edhe ish-ministrat Astrit Haraqija dhe Valton Beqiri.
Vepra penale për të cilën prokuroja speciale po akuzon disa nga protagonistët e aferës “Pronto” është “shkelja e statusit të barabartë të shtetasve dhe banorëve të Republikës së Kosovës në bashkëkryerje”.
Disa prej veprave kanë mbetur në tentativë, thuhet në njoftimin e Prokurorisë së Shtetit.
Sipas aktakuzës, të pandehurit kanë keqpërdorur pozitat e tyre zyrtare duke bashkëpunuar në mes vete për dhënien e privilegjeve dhe përparësive kundërligjshëm personave të cilët kanë konkurruar në funksione të rëndësishme, siç janë: drejtor për ndërmarrjet publike qendrore, kryeshef ekzekutiv i Agjencisë së Regjistrimit në Ministrinë e Punëve të Brendshme, kryeshef i Agjencisë për produkte medicinale dhe koordinator i Qendrës së Regjistrimit Civil në Komunën e Klinës, duke mohuar dhe kufizuar liritë dhe të drejtat e kandidatëve të tjerë, të garantuara me ligj.
Në aktakuzë është trajtuar çështja penale e punësimeve dhe ndarjes së posteve, të bazuara në përkatësinë partiake dhe raporte personale, për të cilin problem për një kohë të gjatë alarmojnë qytetarët e Kosovës, Agjencitë për zbatimin e ligjit, si dhe mediet dhe shoqëria civile.
Afera “Pronto” ishte publikuar nga mediet, duke zbuluar veprimet dhe metodat e punësimit brenda grupeve të ngushta interesi, në bazë të së cilës është nisur hetimi i Prokurorisë, i cili rezultoi me ngritjen e aktakuzës.
