Një fenomen mjaft shqetësues janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. Për një rast të tillë, të denoncuar nga pronari i një shtëpie në Prizren, Policia nisi hetimet, por rezultoi se s’ka të bëjë me vjedhje.
Fillimisht, ankuesi raportoi se hajnat kanë kryer vjedhje në shtëpinë e tij në rrugën “Lulzim Gutaj” në Prizren, ku dyshohej se kanë ‘avulluar’ gjithë stolitë e arit.
Sinjali mëson se pas raportimit të rastit, Policia në koordinim me Prokurorin e Shtetit filluan hetimet, por nuk shkoi gjatë dhe pronari u paraqit sërish në stacion policor.
Sipas informacioneve të para, i njëjti ka deklaruar se gjithçka ka qenë një keqkuptim, pasi ari nuk ishte vjedhur, por e kishin lënë në shtëpinë e tyre në Zvicër.
Lidhur me rastin, Prokurori i Shtetit është vënë në dijeni dhe ka urdhëruar që rasti të procedohet me raport të veçantë, duke konstatuar se nuk ka elemente të veprës penale të “Vjedhjes së rëndë”.
