Dhuna në familje vazhdon të mbetet një nga damkat më të mëdha të shoqërisë kosovare. Çiftet jo rrallëherë nuk arrijnë t’i zgjidhin telashet e tyre dhe eskalojnë në kërcënime e dhunë fizike ndaj njëri-tjetrit. Kështu ka ndodhur edhe mëngjesin e djeshëm në Fushë Kosovë, ku për pasojë dy të rinj janë arrestuar.
Rasti ka ndodhur dje në rrugën “28 Nëntori” në Fushë Kosovë, ku një çift janë përleshur fizikisht me njëri-tjetrin, pas një konflikti familjar.
Burimet e Sinjalit kanë bërë me dije se në këtë rast është përfshirë një grua 36-vjeçare dhe partneri i saj 28-vjeçar.
Fillimisht, 36-vjeçarja është intervistuar si e dëmtuar, ndërsa 28-vjeçari si i dyshuar, por gjatë deklarimeve ka rezultuar se ata kishin sulmuar njëri-tjetrin.
Si pasojë, 28-vjeçari ka pësuar një lëndim në kokë, pasi dyshohet se është goditur me gotë qelqi dhe ka marrë tretman mjekësor në QKUK.
Me urdhër të Prokurorit, pas intervistimit, të dyshuarit janë dërguar në mbajtje për 48-orë.
Ndërkaq, rasti povazhdon të hetohet nga organet e drejtësisë.
