Policia e Kosovës, përmes një njoftimi, ka bërë të ditur se nuk ka asnjë rezultat në gjetjen e dy policëve që u aksidentuan, të shtunën mbrëma, në Kaçanik, me veturë e cila kishte rënë në lumin Lepenc. Kanë treguar se janë të gjithë institucionet që po merren me gjetjen e dy policëve. Nuk kanë treguar nëse ka ndonjë pistë tjetër të hetimeve përpos aksidentit dhe kërkimit të trupave të tyre në Lepenc.
Sipas njoftimit, në aksidentin e ndodhur mbrëmë 28.4.2018 rreth orës 20:45 minuta në rrugën magjistrale Hani i Elezit-Kaçanik, tek vendi i quajtur Kulla me qeshmë, ku një veturë zyrtare e Policisë së Kosovës në të cilën ndodheshin dy zyrtar policor, për shkaqe ende të panjohura kishte humbur kontrollin dhe kishte dalë nga rruga duke rënë nga një lartësi në rrjedhën e lumit Lepenc, nga të gjitha institucionet dhe njësitet prezentë ende vazhdojnë angazhimet intensive drejt kërkimit të dy zyrtarëve policor.
“Ashtu siç është bërë e ditur menaxhmenti i lartë i PK-së, në vendin e ngjarjes kanë angazhuar menjëherë të gjitha njësitë relevante të Policisë së Kosovës, duke përfshirë edhe koordinimin, bashkëpunimin dhe angazhimin e menjëhershëm të njësitit të zjarrfikëseve, ekipit mjekësor, njësitit të FSK-së dhe njoftimit të Kryeprokurorit të Prokurorisë Themelore në Ferizaj, i cili po ashtu ka dalë në vend ngjarje”, thuhet në njoftim.
Sipas Policisë, një interesim dhe përkushtim të pakursyer drejt këtij rasti e kanë dhënë edhe Qeveria e RKS-së, Ministria e Punëve të Brendshme, Policia e Kosovës, FSK-ja dhe institucionet tjera prezentë, ku sot Ministri i Punëve të Brendshme z.Bejtush Gashi, i shoqëruar nga Shefi i Stafit të Kryeministrit z.Avni Arifi dhe U.D. i Drejtorit të përgjithshëm të PK-së z.Naim Rexha, kanë dalë në vendin e ngjarjes për tu kujdesur nga afër dhe për tu njohur me të gjitha zhvillimet rreth rastit.
Krerët e institucioneve gjatë kësaj vizite u zotuan se do të angazhohen maksimalisht dhe nuk do të ndalen për asnjë çast drejt daljes në ndihmë dhe kërkimit të dy zyrtarëve policor të përfshirë në këtë aksident, të cilët kanë qenë në kryerje të detyrës zyrtare.
Po ashtu theksuan se ndajnë shqetësimin me familjarë dhe zyrtarë policor në këtë fazë shumë të vështirë për fatin e dy policëve, të cilët ishin në shërbim të qytetarëve dhe vendit.
Njëkohësisht u falënderuan të gjitha institucionet, njësitet, qytetarët dhe zyrtarët policor që janë duke vazhduar me aktivitetet drejt kontrollimit të terrenit dhe rrjedhës se lumit ku ka ndodhur aksidenti.
