Sot janë bërë tetë vjet që kur ndërroi jetë poeti i madh i Kosovës, Ali Podrimja.
Në këtë tetëvjetor e ka kujtuar ministrja e Kulturës, Vlora Dumoshi, e cila tha se gjatë këtyre viteve Podrimja ka munguar fizikisht, por që gjithmonë mbet në kujtime përmes trashëgimisë letrare që la pas.
“Ali Podrimja, i cili ka qenë autor i shumë vëllimeve me poezi dhe me të drejtë konsiderohet një poet i kalibrit ndërkombëtar dhe si ndër përfaqësuesit më të njohur të poezisë së sotme shqiptare. Poezia e tij ka qenë e pasur me figurshmëri poetike dhe me nivel të lartë kuptimor e sensual. Podrimja përmes artit poetik ka përçuar kulturën e traditën shqiptare dhe me krijimtarinë e tij e ka ngritur në një nivel tjetër poezinë shqipe”, ka shkruar Dumoshi.
Dumoshi shtoi se poezitë “Lum Lumi”, “Unë, biri yt, Kosovë”, dhe shumë e shumë poezi tjera të Aliut do të mbesin gjurmë të pashlyera në kulturën moderne të Kosovës.
“E kujtojmë me mall dhe krenari poetin e paharruar Ali Podrimja. Krenohemi që e patëm dhe mburremi ende para popujve tjerë me krijimtarinë e madhe e të bukur që ka lënë pas”.
