Kandidatja për kryeministre nga radhët e Lidhjes Demokratike të Kosovës, Vjosa Osmani ka takuar simpatizantët dhe strukturat e LDK-së në Llap, njofton Llapi.info.
Osmani, në këtë takim ku morën edhe strukturat e kësaj partie në Podujevë, ka shtuar se Llapi s’ia ka kthyer shpinën kurrë Kosovës.
“Llapi s’ia ka kthyer shpresën Kosovës edhe në kohërat më të vështira. Në Llap i ka rrënjët edhe familje ime, jo vetëm rrënjët por edhe krahët. Llapi nuk ia ka kthyer shpinën kurrë rrugës së drejtë të Ibrahim Rugovës. Ishin ju llapjanët që i ndezët kushtrimit e mobilizimit të Ibrahim Rugovës. Edhe në kohërat më të brishta askush nuk ka mundur ta ndal fitoren e LDK-së. Asnjëri nga ne nuk kemi harruar në çfarë gjendja ishim në atë kohë dhe nga kush rrezikohej Kosova. Por askush se kishte imagjinuar se Rugova pas kthimit të tij nga Italia kishte zgjedhur të vizitonte Llapin. Ai kishte shkuar për të nderuar Bradashin e Enver Malokut, Podujevën e Xhemajl Mustafës, Zahir Pajazitit e Hakif Zejnullahut. Pra ju të gjithë të ndizni kushtrimit për fitoren e shtetit ligjor, ku të rinjtë e të rejat e gjejnë vetën dhe nuk turpërohen nga liderët e vetë. Pra gjendemi në kullën e pamposhtur të LDK-së”, ka shtuar Osmani në këtë tubim.
Tutje Vjosa Osmani, në fjalimin i bëri thirrje elektoratit të Lidhjes Demokratike të ndezin kushtrimit për fitorën e shtetit ligjor, duke shtuar se ky ishte amanet i presidentit Rugova.
“Amaneti i presidentit Rugova për shtet ligjor akoma nuk është plotësuar. Ja kemi borxh atij, ja kemi borxh secilës familje, secilit dëshmor që dha jetën për liri. Ja kemi borxh të rinjve që të mos ikin. Ja kemi borxh secilës nënë që ka përjetuar ikjen e bijve e bijave të tyre. Të mobilizohemi që ta nxjerrim Kosovën nga humnera, nga rreziku i copëtimit dhe ta shpëtojmë nga ata që e plaçkitën Kosovën duke mos menduar aspak për popullin. Ne duhet bashkë me ju ta bindim secili nënë secilin babë, që ta zgjedhin qëndrimin e duhur sepse pas 6 tetorit do të përfaqësohen nga njerëzit me duar të pastra. Ne do të ja kthejmë shpresën, për Shëndetësi më të mirë, Arsim më të mirë. Një vend që mund të jetojmë dinjitetshëm”, ka thënë tutje ajo./Llapi.info
